cazo

Recipiente de cociña con mango, xeralmente con bico, e máis amplo pola boca ca polo fondo, que se utiliza para cociñar ou quentar líquidos e alimentos.

Etimoloxía

Non se coñece a súa orixe.

Exemplos *

“A avoa contábanos de nenos que se deixabas o cazo de leite destapado perdíase porque o trasno da casa lavaba o cu nel.” (Manuel Rivas: Os comedores de patacas)

“O sacrificio do afeitado, o cazo do café con leite, deixado de noite pola irmá, posto a ferver mentres asentaba a navalla para repasar a barba.” (Xosé Manuel Martínez Oca: Beiramar)

* As citas da Palabra do Día respectan as escollas ortográficas e morfolóxicas da edición referida.