O 16 de xuño, na sede da Academia presentáronse as novidades na web do Portal das Palabras, os cambios no Dicionario RAG e as novas versións para móbiles. Todas as iniciativas son produto do convenio asinado hai tres anos entre a RAG e a Fundación Barrié para a modernización da lexicografía en Galicia.
O Portal das Palabras é hoxe unha das maiores referencias en léxico
No acto participaron os presidentes da Academia e da Fundación Barrié, Alonso Montero e José María Arias, e mais o secretario da RAG, Henrique Monteagudo.
Os tres intervenientes insistiron en que por capacidade de actualización, número de visitas e prestixio, o Portal das Palabras é hoxe unha das maiores referencias en léxico, tres anos despois da súa presentación.
Melloras na web
A web renovada conta con máis propostas, utilidades, capacidade de adaptación e posibilidade de crecer. O novo xestor está baseado en WordPress para facer un Portal máis potente, versátil e compatible con diferentes formatos de contido. Agora, a web adáptase a diferentes pantallas.
Engadiuse a nova sección Allos con Bugallos, con contidos diversos de interese lexicográfico e lingüístico en xeral. Ademais, desenvolvéronse utilidades como Palabras Traballadas, que localiza calquera termo sobre o que creamos algún contido, e Buscador de Palabras do día, que permite atopar as palabra publicadas por múltiples filtros.
Temos máis propostas, utilidades e posibilidade de crecer
Cambios no Dicionario
Entre as novidades:
– Na busca preditiva aparecen os femininos nas palabras con variación de xénero
– Ofrécense as conxugacións verbais
– Creáronse sistemas de listaxe e procura dos últimos termos actualizados.
– Como un primeiro experimento puxemos en marcha un bot, asociado ao Dicionario, para o messenger de Facebook –Dicionario RAG–, que define os termos que se lle solicitan. Máis adiante prepararanse aplicacións similares para Telegram e Whatsapp.
Redeseño na app
Con nova aparencia e funcións, agora a app conta con buscador de sinónimos, acceso a unha versión dos xogos en formato móbil e un sistema de actualización automatizada da base de datos de palabras.
As versións do Dicionario para Android e iOS son das máis innovadoras de Europa
Versión para móbiles dos xogos
Os xogos adáptanse ás tabletas e móbiles, e prepáranse para poder interactuar só co dedo polgar.
O Portal, en expansión
Logo destes anos investigando e poñendo en marcha novas posibilidades para o traballo lexicográfico, estamos convencidos de que a metodoloxía e a tecnoloxía coa que se desenvolven o Portal e as ferramentas asociadas –aplicacións móbiles e Dicionario–, resultarán de interese para calquera contexto lingüístico. Por esta razón, anunciamos que comezamos un proceso para dar a coñecer internacionalmente a nosa experiencia co fin de exportar estas utilidades alén das nosas fronteiras e que se sexan aproveitables por outras linguas.
Ao tempo e noutra dirección, ofreceremos a centros educativos, asociacións ou calquera outro colectivo interesado no léxico en Galicia, a oportunidade de crear réplicas do Portal das Palabras, aproveitando, deste xeito, a nosa tecnoloxía para elaborar e publicar os seus propios contidos.