A voz elixida como Palabra do Ano 2023 –cibercarracho– acaba de ser gravada no paseo das Palabras do Ano da cidade de Lugo. O presidente da Real Academia Galega, Víctor F. Freixanes, e o responsable de Patrimonio e Cultura da Fundación Barrié, o académico correspondente Diego Rodríguez, achegáronse onte á rúa Menorca acompañados do tenente de alcalde, Rubén Arroxo, e a concelleira de Cultura, Turismo e Promoción da Lingua, Maite Ferreiro onde loce o vocábulo escolleito polas persoas participantes no proceso de selección a través do Portal das Palabras.
O presidente da RAG agradeceu a iniciativa do Concello de Lugo de fixar na rúa Menorca as voces elixidas nas votacións populares promovidas a través dunha iniciativa da que destacou precisamente a participación cidadá. Neste caso trátase dun neoloxismo de carácter coloquial que equivale os termos do ámbito da informática ciberdelincuente ou mesmo pirata informático.
Diego Rodríguez aplaudiu tamén a iniciativa do Concello de Lugo, que -dixo-fixa na pedra unha iniciativa nada na contorna dixital, dándolle así unha nova dimensión e continuidade.
Rubén Arroxo explicou que co paseo das Palabras do Ano o Concello de Lugo persegue mellorar a imaxe da cidade e, ao mesmo tempo, valorizar “un símbolo tan importante como a lingua galega”. O tenente de alcalde asegurou ademais que a rúa Menorca se converteu xa nun atractivo turístico máis de Lugo.
Como ben sabedes, o Portal das Palabras é unha iniciativa da Real Academia Galega e a Fundación Barrié para a divulgación do léxico galego dunha maneira amena e en diálogo coa actualidade. Dende hai anos, ambas as idúas nstitucións promoven a través deste espazo a elección da palabra do ano. Dende 2014 o Portal das Palabras convida a todas as persoas que o desexen a participar na escolla da Palabra do Ano. Nas edicións anteriores foron elixidas as seguintes voces comadre (2022), tanxugueiras (2021), nós (2020), sentidiño (2019) deseucaliptización (2018), afouteza (2017), irmandade (2016), refuxiado, -a (2015) e corrupción (2014), todas elas incluídas no paseo da rúa Menorca.
