Xa é unha tradición que por estas datas comecemos a campaña para a elección da Palabra do Ano 2024. A Real Academia Galega e a Fundación Barrié abren desde esta mañá a primeira fase desta iniciativa promovida a través do Portal das Palabras.
Queremos facer balance dos últimos meses escollendo de maneira colectiva a Palabra do Ano. Elixide voces que resuman como os vivistes, que garden relación ou dean nome a algunha das vosas preocupacións ou a algún fenómeno novo, e mesmo que salienten as aspiracións de todos e todas para despedírmonos do ano que remata e dármoslle a benvida ao próximo cunha ilusión renovada. Poden ser tanto voces tradicionais da lingua galega coma neoloxismos e sintagmas nominais non rexistrados do Dicionario da Real Academia Galega.
A escolla consistirá nun proceso colectivo de tres fases:
Primeira fase
Recolleremos as vosas suxestións NESTA LIGAZÓN ata o domingo 8 de decembro ás 23:59 horas.
Segunda fase
O mércores 11 de decembro anunciaremos cales son as palabras finalistas. Poderedes votar pola vosa favorita ata as 23:59 horas do mércores 25 de decembro.
Terceira fase
A Palabra do Ano darase a coñecer nos últimos días do 2024.
Tomade nota do calendario, participade en cada fase e compartide!
