Moito nos tarda darlle a benvida ao 2021, e iso supón despedir como é debido o 2020. Facelo ben require reflexionarmos colectivamente sobre o que significaron os últimos doce meses e, como non, que ese traballo dea froito á Palabra do Ano!

Axudádesnos a buscala? Anotade os pasos que temos que seguir!

Primeira fase

Recepción de propostas. Recolleremos as vosas suxestións dende o martes 1 de decembro ás 00:00 horas ata o domingo 13 de decembro de 2020 ás 23:59 horas.

Segunda fase

O luns 14 de decembro anunciaremos cales son as palabras finalistas. Poderedes votar pola vosa favorita ata as 23:59 horas do venres 25 de decembro.

Terceira fase

Tras recontarmos os votos, o luns 28 de decembro desvelaremos cal é a Palabra do Ano 2020.