Lexicógrafos do Seminario traballando na sede coruñesa da Barrié

A comezos de 2012, a Real Academia e a Fundación Barrié acordaron traballar conxuntamente na modernización da investigación lexicográfica galega, na creación de novos produtos e utilidades relacionados co léxico e na difusión dos resultados e do propio proceso en si. O acordo contempla a utilización dun espazo no edificio coruñés da Fundación polo Seminario de Lexicografía, a dotación informática do mesmo, a creación dun dicionario electrónico e a posta en marcha deste Portal das Palabras como obxectivos inmediatos.

Ao tempo que se redefiniu a estrutura de información do DRAG para a posta en marcha dunha versión electrónica, un equipo conxunto das dúas institucións valorou as necesidades de hardware e software do Seminario fronte ás novas metas. Este grupo consultor decidiuse por unha estrutura en rede de computadores portátiles, mais pantalla e teclado, traballando contra un servidor e utilidades específicas para traballos léxicos.

En concreto unha “suite” da empresa surafricana Tshwanedje que conta con programas de elaboración de dicionarios, tratamento terminolóxico e de análise de corpus lingüísticos.

En setembro de 2012, o Seminario comezou a traballar na sede da Barrié coas novas ferramentas informáticas. A adaptación de formatos e metodoloxía foi ardua e complexa mais a implantación permite, na actualidade, traballar con maior seguridade e un mellor control dos datos. Asemade, proporciona unha maior rapidez na xestión e na localización da información, así como desenvolver con efectividade solucións como a creación de referencias cruzadas entre lemas, un dicionario de sinónimos e antónimos, e a posta en marcha dun potente sistema de busca avanzada.

O convenio leva consigo o lanzamento de aplicacións gratuítas do anovado Dicionario para móbiles e computadoras de man con sistemas operativos iOS ou Android. Estas apps conteñen o Dicionario completo, o que permite consultalo sen necesidade de estar conectado.

As entidades asinantes do convenio anuncian, para 2013 e mais o ano vindeiro, melloras e ampliacións de uso do Dicionario na web e nos dispositivos móbiles, así como unha constante renovación do Portal das Palabras.

Os promotores valoran o traballo realizado como moi importante para a lingua e fundamental para a difusión e coñecemento do noso léxico, concluíndo que a marcha do proceso e os produtos desenvolvidos, ata o momento, colocan o galego na vangarda da modernización e divulgación lexicográfica, probablemente por diante doutras linguas románicas.