Seica van prenderse en breve as luces do Nadal, así que no Portal das Palabras decidimos tamén adiantar un chisco a campaña para que escollades a Palabra do Ano 2025.
A escolla consistirá nun proceso colectivo de tres fases:
Primeira fase
Agardamos as vosas suxestións NESTA LIGAZÓN ata o luns 1 de decembro ás 23:59 horas.
Segunda fase
O mércores 3 de decembro anunciaremos cales son as palabras finalistas. Poderedes votar pola vosa favorita ata as 23:59 horas do domingo 21 de decembro.
Terceira fase
A Palabra do Ano 2025 darase a coñecer nos últimos días de decembro.
Tomade nota do calendario, participade en cada fase e compartide! Lembrade que a Palabra do Ano 2025 pode reflectir dalgún xeito como pensades que se viviron colectivamente estes últimos meses, designar un fenómeno froito dos tempos que corren ou mesmo darlle nome a algunha aspiración colectiva, algo polo que devezades nesta despedida do 2025 e benvida ao 2026.
