Para finalizar este verán tan xoguetón non nos queda outra que darlle unha volta á pilla, un divertimento que che é vello coma o mundo e cuxa práctica relacionamos coa rapazada. Así e todo, os adultos trouleamos con el dun xeito ou doutro, dado que pasamos media vida a correr para que non nos pillen. Neste xogo fórmanse dous equipos, máis ou menos parellos, e  nel hai que facer prisioneiros os participantes do equipo contrario; gaña o que menos integrantes perda e máis pille do contrario. Esta actividade lúdica tamén é coñecida como o marro ou o telo.

Ao redor deste xogo aparecen moitas outras modalidades distintas que parten dun concepto común: o de pillarmos uns a outros, pero con certas diferenzas, como é o caso do pano. Este consiste en que dúas persoas, ao rematar unha conta, deben coller o pano que unha terceira sostén no ar. O que o atrapa sae correndo e o outro adversario debe intentar pillalo antes de que se salve chegando á casa. As quedas é outra sorte de xogo de persecución infantil no que un dos xogadores debe atrapar todos os demais ou un deles. A pita cega é outra modalidade de divertimento persecutorio no que quen lle toca perseguir teno que facer cos ollos vendados cun pano, o que aumenta a dificultade.

O termo pilla é un derivado regresivo do verbo pillar, que procede da voz italiana pigliare (‘coller’). Sobre a mesma base atopamos locucións como xogar ás pilladas ou ao pilla-pilla. Noutras linguas tamén atopamos nomes que participan de denominacións creadas de xeito semellante ao noso, é dicir, que parten dunha forma verbal relacionada co concepto ‘atrapar’, como o verbo inglés to catch, (‘pillar’); en Portugal, o substantivo apanhada, derivado sobre apanhar, e, en italiano, acchiapparella, que se forma a partir do verbo acchiappare (‘coller’). Por outro lado, atopamos unha serie de designacións formadas ao redor de certos animais, como en catalán, que se rexistra gat i la rata; en francés, jeu du loup ou jouer à chat; ou en italiano, lupi. Todas estas denominacións están motivadas no feito de que os animais  que designan este xogo son cazadores que perseguen as súas presas.