billete

Detalle dun billete completo do sorteo de Lotería Nacional celebrado en 1962. Imaxe cortesía do Archivo Histórico-Museo SELAE

Dende hai séculos vivimos coa teima de ter unha mínima cantidade de cartos ou diñeiro para financiar a nosa existencia. Chegar a eles é moi custoso, salvo para os ricos de nacenza; o resto procuramos gañalos co traballo e o esforzo, pero hai un camiño máis curto: que nos toquen montes e moreas mediante os diversos xogos de azar. A raíña deles é a lotaría. Moi poucas persoas poden dicir que nunca mercaron un billete de lotaría na súa vida porque, sen ser un ludómano, calquera xogou, como mínimo, a de Nadal, que ten un suculento premio co que xa estamos a soñar outra ver por estas datas.

A lotaría nacional de billetes é relativamente recente entre nós, data do 25 de decembro de 1811. Durante a guerra de independencia española (1808-1814) cumpría encher as arcas do Estado e ideouse como un xeito de recadación menos lesivo e non tan impopular como o son os trabucos. Así foi como naceu a tamén chamada lotaría moderna, á que debemos a acepción de billete como ‘papel que demostra a participación nunha rifa ou lotaría’. Inda que para sermos exactos o billete é cada unha das fraccións nas que se divide unha serie desde o número 00000 ao 84.999. O billete de lotaría divídese, á súa vez, en dez décimos, os que mercamos o común dos mortais.

O termo billete procede do francés billet (séc. XIV) cun significado semellante ao galego que vén, á súa vez, do termo billette, unha alteración dun orixinario bullette ‘documento’, continuador dun diminutivo do vocábulo latino bulla ‘selo’. A palabra estudada ten dous significados máis, ademais do de participación nun sorteo: boleto e papel moeda. Estas dúas acepcións remiten ao concepto de ‘pequeno documento con valor para acceder a un lugar, ou para permitir o intercambio comercial’. A bulla era unha pequena bóla de chumbo que colgaba dos documentos dos papas e soberanos para certificar a súa oficialidade, documentos sen dúbida moi cobizados, como o son o papel moeda en forma de billetes e os billetes que che permiten voar a un paraíso afastado. E xa non digamos un billete (10 décimos) do Gordo da lotaría de Nadal.

Palabras traballadas

Todos os termos que traballamos, fóra das Palabras do día, ordenados alfabeticamente.

Ver

Palabras do día

Unha palabra cada día dos 365 do ano, ordenadas alfabeticamente ou por data.

Ir

Axúdasnos a mellorar? Pechar

A túa opinión impórtanos. Queremos saber como usas o Portal das Palabras, que che gusta máis e se botas algo en falta.

Enredarache moi pouco tempo!.

Cubre a enquisa aquí