“Abáboro”, “abázcaro” ou “abellón” é o significado orixinal da palabra drone en inglés, idioma de onde vén este termo –aparece por primeira vez nunha revista científica en 1946– que denomina as ‘naves pilotadas a distancia ou programadas, con autonomía ou semiautonomía, capaces de realizar distintas tarefas específicas durante o voo’, e que recordan un macho da abella robótico.
Tendo en conta a relativa extensión entre os falantes de dron, pode considerarse instalado na lingua, non parece problemático adoptar o anglicismo para esta acepción. É unha adecuación á grafía e á pronunciación galegas do préstamo inglés drone, sobre todo, porque a adaptación non implica grandes cambios gráficos. Como tampouco é unha palabra cun uso tan habitual ou cotián crese que non é preciso habilitar un termo propio para nomear estes artefactos. A postura respecto a este neoloxismo concorda coa da maioría das linguas da nosa contorna. Como alternativa a dron, cabería a posibilidade de empregarmos un sintagma descritivo do obxecto, tal que vehículo aéreo non tripulado ou aeronave non tripulada, se ben o índice de uso destas expresións é máis baixo, o mesmo que aconteceu na lingua de orixe, onde nun primeiro momento se empregaron fórmulas do tipo unmanned aircraft ou unmanned aerial vehicle, que logo caeron en desuso fronte a drone.
No século XIX, os austríacos ensaiaran os precursores dos drons, cando tentaron atacar Venecia con globos aerostáticos inzados de bombas, así que a idea nun principio era destinalos a un uso netamente militar, pero na actualidade empréganse tamén no ámbito civil con distinto aproveitamento: exploración e limpeza de residuos tóxicos, captación de imaxes espaciais ou mesmo para o pastoreo e a mensaxería. Os modelos máis básicos convertéronse nun trebello de divertimento, xa sexa como xoguete para os máis pequenos, xa como un enredo para maiores facendo fotos e vídeos. Todos estes novos usos consolidan a presenza de dron no discurso oral e mais nos medios de comunicación, o que implica a súa incorporación nos dicionarios de lingua.
