Se simpatizamos coa tendencia do “faino ti mesmo” pode resultar máis doado achegarnos a unha nova cultura que baseada nesa idea utiliza a tecnoloxía, busca a innovación e promove o coñecemento aberto: o movemento dos facedores (The maker movement). Para eles non se trata só de ser creativos, senón de trasladar as ideas á realidade volvéndoas algo tanxible.
Tendo en conta isto, parece acaído o termo facedor, derivado de facer e este resultado da evolución do verbo latino facere, para trasladar o inglés maker. E é que facedor é, en xeral, aquel que realiza algo, non importa o que, moi próximo ao sentido da palabra inglesa, que se utiliza frecuentemente nesa lingua combinado con outro substantivo para denominar a persoa que fabrica algo ou a máquina que serve para elaboralo, dun xeito que se podería comparar ao noso sufixo –eiro (cheese maker ‘queixeiro’, clock maker ‘reloxeiro’).
A cultura facedora alicérzase, pois, sobre unha base tecnolóxica, pero, a diferenza da dos hackers, está máis interesada nos obxectos físicos e na creación de novos recursos. Sitúase na liña do construtivismo pedagóxico, xa que parte do principio de que se aprende facendo e está centrada nas habilidades prácticas. Ademais, a xente deste movemento pon en conexión eidos tradicionalmente afastados como a informática e a artesanía. E, como se considera sumamente positivo compartir e intercambiar coñecementos, contan con espazos virtuais e publicacións, pero tamén con feiras onde exhiben os seus logros. No país xa se celebraron algunhas como se pode comprobar revisando o arquivo da web makerslugo.org, activa desde decembro de 2013.
A principios do século XX o filósofo francés Henri Bergson acuñaba o concepto do Homo faber, que utilizaba para explicar a posición privilexiada dos humanos entre os demais seres do planeta que, segundo este pensador, veu dada pola busca e fabricación dos apeiros precisados para valerse no medio natural. Parece evidente que estamos ante unha nova fase deste proceso, axudado agora, en gran medida, pola ferramenta insignia dos facedores: a impresora 3D. Xa deixou dito Bergson que a intelixencia consiste na facultade de fabricar útiles e de modificalos indefinidamente e, engaden os facedores, se podes imaxinalo, podes facelo.
