feminización

Houbo un tempo no que o mundo da ciencia e da universidade estaba vetado ás mulleres. Pero na primeira metade do século XIX houbo unha moza ferrolá que non se resignou a aceptar este veto. Daquela vestiuse de home e comezou a asistir a clases de Dereito na Universidade Central de Madrid como ouvinte. Ela era Concepción Arenal, nada hai douscentos anos e precursora no proceso de feminización dos estudos universitarios. Ben é certo que tivo que ser ás agachadas, xa que a primeira muller que se puido matricular oficialmente nunha universidade española tivo que agardar a 1872, e precisou ademais un permiso especial das autoridades. As barreiras legais que arredaban as mozas dos campus caerían finalmente en 1910, pero a presenza feminina nas aulas universitarias tardaría moitas décadas en facerse notable.

O termo feminización é un substantivo abstracto que deriva do verbo feminizar, que á súa vez remite ao termo latino femina ‘muller’. Segundo o Dicionario, designa o “proceso mediante o cal aumenta a presenza ou relevancia da muller nun determinado ámbito ou práctica”. A aparición deste termo xorde da evolución da sociedade, na que a muller accedeu a ámbitos inalcanzables ata hai pouco. O ensino superior é un deles. Hogano nas aulas das facultades non nos sorprende a presenza de alumnas, inda que a festa será completa cando elas sexan máis nas enxeñarías e eles se acheguen sen que nos abraie ás que se dedican ao coidado.

Estase facendo camiño, inda que amodo, xa que a feminización debería acadarse tamén nos postos de responsabilidade na política (candidatas á presidencia dos diferentes gobernos), na banca e nos consellos de administración das empresas que cotizan no IBEX 35. A muller e a visión feminina é necesaria para acadar a igualdade entre homes e mulleres.

A segunda acepción de feminización refírese ao “paso de xénero masculino ou neutro a feminino”. Dado que a lingua e o seu uso non é inocente, o emprego da flexión de xénero axuda á consolidación dunha nova realidade, a das enxeñeiras, cirurxiás, capitás ou dos enfermeiros e os coidadores.

A feminización é o xeito de visibilizar “facer visible” a metade da poboación mundial. Tanto para indicar o seu apoderamento nas novas circunstancias, como para denunciar cando constatamos que a pobreza e a precariedade está sendo feminizada.

Palabras traballadas

Todos os termos que traballamos, fóra das Palabras do día, ordenados alfabeticamente.

Ver

Palabras do día

Unha palabra cada día dos 365 do ano, ordenadas alfabeticamente ou por data.

Ir