viral

As redes sociais ocupan arestora unha gran parte da nosa vida en internet: noticias e vídeos que se comparten, mensaxes, comentarios, convocatorias… A inmediatez e as posibilidades de interacción directa das persoas en rede, as plataformas adaptadas á telefonía móbil, a mellora nos largos de banda e a lixeireza dos últimos formatos audiovisuais permiten que calquera poida compartir información do que pensa ou do que nos arrodea e que esta poida chegar a un número determinado de persoas que a propagan para facela chegar a moitas máis. É este tipo de espallamento en rede, multiplicativo e, sobre todo veloz, ao que se denomina viral. Así, fálase dun fenómeno viral, de mercadotecnia viral ou de vídeos virais. O adxectivo viral comezou a utilizarse con este sentido contra 1990 e, ao igual que vírico, viroso ou virulento, procede de palabra latina virus. Inicialmente facía referencia a un veleno ou unha substancia nociva e daniña e reutilizouse para a ciencia xa por 1728, aínda que a existencia dos virus non se demostrase ata arredor de 1892.

A clasificación científica sitúa os virus no límite das formas de vida: é certo que se reproducen (en realidade multiplícanse), pero non medran nin precisan alimentarse coma os outros seres vivos. Os virus son a causa dalgunhas das enfermidades (viroses) máis comúns (como o arrefriado) ou erradicadas (o que lle pasou á varíola) que sofren os seres humanos.

A reprodución característica dos virus deu lugar a outro sentido non médico, anterior ao das redes sociais: úsase para programas que infectan fontes de datos (como ordenadores) e que se reproducen (transmiten) axiña. Trátase dos famosos troianos e vermes. A difusión do correo electrónico e de internet permitiu que os computadores se contaxiasen rapidamente entre si, o cal favoreceu o nacemento e desenvolvemento dos programas antivirus.

Palabras traballadas

Todos os termos que traballamos, fóra das Palabras do día, ordenados alfabeticamente.

Ver

Palabras do día

Unha palabra cada día dos 365 do ano, ordenadas alfabeticamente ou por data.

Ir

Axúdasnos a mellorar? Pechar

A túa opinión impórtanos. Queremos saber como usas o Portal das Palabras, que che gusta máis e se botas algo en falta.

Enredarache moi pouco tempo!

Cubre a enquisa aquí