Paxaro da familia dos motacílidos, do que existen diversas especies, de cor gris ou verdosa polo lombo e branca ou amarela polo ventre, cunha cola longa que abanea con elegancia ao andar, voo lixeiramente ondulado e que vive en lugares húmidos
Etimoloxía
Palabra derivada sobre a voz “alindar” e esta remite a “lindar” que procede do latín limitare de significado semellante. O nome científico é Motacilla alba.
Exemplos *
“Todas estas especies son coñecidas tamén cos nomes de costureiras e señoritas (pola súa rechamante garrideza), alindadoras (por andar polas beiras dos camiños e campos), labrandeiras, rabandoiras, paxariñas da neve. Están protexidas pola lei .” (Xosé Manuel Penas Patiño e Carlos Pedreira: Guía das aves de Galicia, 1980)
“Na leira, adoita situarse xusto detrás do arado ou outros apeiros, para comer os vermes, larvas de insectos e semellantes que van saíndo á luz a medida que se lle dá a volta á terra; así, non falta quen pense que está acompañando os bois e a chame alindadora.” (Xosé Afonso Álvarez Pérez: “Cartografía lingüística de Galicia e Portugal” en Actes del XXVI Congrés Internacional de Lingüística i Filologia Romàniques, p. 29-40, 2013)
* As citas da Palabra do Día respectan as escollas ortográficas e morfolóxicas da edición referida. Os exemplos fan referencia só a unha das posibles acepcións da palabra documentada.
