carantoña

Obxecto con que se cobre a cara para non ser recoñecido, por exemplo durante o Entroido.

Etimoloxía

Non hai acordo sobre a súa orixe. Para uns estudosos deriva de cara e para outros procedería do latín character co sentido de 'símbolo máxico'.

Exemplos *

"Ó premer un botón apareceron na porta unha serie de homes e mulleres espidos, todos mutilados e cunhas carantoñas repelentes." (Úrsula Heinze: Remuíños en coiro)

"Nas aldeas da montaña trouleaban de xeito máis aberto, comunal e colectivo. En Soldón da Seara participei algún ano nunha procesión de carantoñas …" (Xosé Estévez: A lagoa da memoria)

* As citas da Palabra do Día respectan as escollas ortográficas e morfolóxicas da edición referida.