Carpeta grande para gardar libros, documentos, papeis etc.
Etimoloxía
Vocábulo do que a súa orixe é incerta, quizais do latín baixo chartapacium 'carta de paz'.
Exemplos *
“Sen saber por que, pensei naquel gando que oía bruar, ás veces, entre a néboa e que o vaqueiriño, ó volver da escola, co cartapacio aínda debaixo do brazo, tanxía, entre os pastos mollados, a corte quente, olorosa.” (Xosé Alvilares: Memorial de agravios, 1992)
“Ademais dos libros de consulta, tiña un cartapacio onde ía gardando dende había anos anotacións e debuxos da súa autoría agrupados baixo o título A intimidade da mar.” (Manuel Rivas: Os libros arden mal, 2006)
* As citas da Palabra do Día respectan as escollas ortográficas e morfolóxicas da edición referida. Os exemplos fan referencia só a unha das posibles acepcións da palabra documentada.
