castro

Poboado fortificado da Idade de Ferro ou final da Idade de Bronce, propio da Europa occidental.

Etimoloxía

A súa orixe está no latín clásico castrum, –i 'castelo', 'fortaleza' ou 'praza fortificada'.

Exemplos *

"O castro erguíase na montaña, moitas máis pallozas ca todas as do val xuntas, defendidas por catro ou cinco murallas de terra." (Xosé Miranda: Infancia e desventura de Lino Carrán)

"O uso do carro polos habitantes dos castros é un feito probado, pois nalgunhas citanias do Douro atopáronse pegadas ou sinais de rodas." (Xosé Lois Ripalda: A cultura do pan)

* As citas da Palabra do Día respectan as escollas ortográficas e morfolóxicas da edición referida.