flanela

Tecido fino de la ou algodón, semellante á baeta, aínda que de menos corpo ca esta, moi suave e cunha cara coma se estivese cardada.

Etimoloxía

Esta palabra procede do francés flanelle, tomado do inglés flanel, que á súa vez vén do galés gwalanen 'pano de la'.

Exemplos *

"… o comandante do posto, cando saíu da cama en cirolas de flanela, encontrou ameazantes bocas de fogo ante os ollos …" (Darío Xohán Cabana: Vidas senlleiras)

"Aínda non colgara o gabán cando un home groso, de barba cana e cabelo descoidado, apareceu pola porta cunha refucida camisa de flanela a cadros." (Xabier Quiroga: Atuado na braña)

* As citas da Palabra do Día respectan as escollas ortográficas e morfolóxicas da edición referida.