Estado de máxima felicidade
Etimoloxía
Palabra que chega desde o sánscrito nirvāṇa que significaba literalmente 'extinción' dos malos pensamentos que nos fan sufrir.
Exemplos *
“O de acolá chámao bisbiseando para lle dar, anicado ao seu carón, unhas suaves palmadiñas na cabeza que Tigre agradece encantado, erguendo dereito o rabo e fechando os ollos cunha expresión de pracer próximo a ese nirvana felino que é o ronroneo.” (Manuel Portas: Un dedo manchado de tinta, 2011)
“Unha chamada veu rachar aquel nirvana de sorrisos e complicidade, de aloumiños a distancia e de actividade rutineira, de parella estable e vida harmónica.” (Xavier Queipo: Papaventos, 2001)
* As citas da Palabra do Día respectan as escollas ortográficas e morfolóxicas da edición referida. Os exemplos fan referencia só a unha das posibles acepcións da palabra documentada.
