palafita

Vivenda prehistórica construída sobre piares nun lago, pantano etc.

Etimoloxía

Procede do termo italiano palafitta de significado análogo e este é un híbrido dos vocábulos latinos palus 'pau' e fictus 'fixo', 'cravado'.

Exemplos *

"Na parte chá, asolagada, sobresaían as cabanas de venda de bebidas e tapas, co seu xeito de palafitas, feitas en madeira, con cuberta de palla, palmeira ou xestas secas, e sostidas en postes fondamente espetados na area." (Manuel Rivas: Os libros arden mal)

"Días máis tarde, un pescador observou como o forasteiro construía unha especie de palafita preto da illa da Saimia, e como chantaba pontes de troncos no medio da auga para comunicar o seu mundo coa beira máis próxima do río." (Lino Braxe: A cor do ceo)

* As citas da Palabra do Día respectan as escollas ortográficas e morfolóxicas da edición referida.