xeito

Arte de pesca que consiste nunha rede longa que se estende e se deixa durante horas para que a sardiña que se despraza co cambio de marea malle nela.

Etimoloxía

A palabra da que procede é o latín iactus, -us 'lanzamento'.

Exemplos *

"Eran as xentes do mar, mariñeiros das rías e da sardiña, da dorna e do vello xeito, desterrados das praias, orfos, perdidos nos camiños coma ánimas doentes …" (Víctor Fernández Freixanes: O triángulo inscrito na circunferencia)

"… cando se andaba ao xeito era habitual que cada home levase 50 sardiñas …" (Francisco Calo Lourido: Xentes do mar. Traballos, tradición e costumes)

* As citas da Palabra do Día respectan as escollas ortográficas e morfolóxicas da edición referida.