zoqueiro, -a

Persoa que fai zocos ou zocas.

Etimoloxía

Creación sobre o termo zoco que, á súa vez, chega da palabra latina soccus, –i 'calzado propio das persoas que actuaban nas representacións teatrais'.

Exemplos *

"Dende neno, o señor Manuel, o zoqueiro, dera en facer santos. Santos de vestir, ben entendido, testas e mans de buxo…" (Xosé Filgueira Valverde: Quintana viva)

"Tampouco se agachara entre tendais de roupa nin por onda o zoqueiro e os zapateiros." (Xabier Quiroga: Atuado na braña)

* As citas da Palabra do Día respectan as escollas ortográficas e morfolóxicas da edición referida.