No ano que rematou empregastes máis ca nunca o Dicionario da Real Academia Galega. Cómpre, polo tanto, darvos as grazas máis ca nunca por estardes detrás dunha marca histórica: máis de 38.500.000 procuras! Agardamos que a medida que avance o 2021 sexa máis real ca virtual pero confiamos tamén en que todas aquelas persoas que vos enganchastes ao Dicionario nos últimos meses manteñades este hábito tan saudable de consultalo.
O Dicionario en liña da Real Academia Galega funciona dende o ano 2013. Dende entón, esta ferramenta esencial da lingua galega non deixou de medrar, e a súa utilidade social fíxose aínda máis evidente en pleno confinamento, cando milleiros de persoas tiveron que teletraballar e os estudantes continuaron co proceso de aprendizaxe de xeito telemático. A entrada en vigor do primeiro estado de alarma por mor da pandemia marcou, de feito, un punto de inflexión e acadou o rexistro mensual máximo no mes de maio, que concluíu con máis de 4.800.000 consultas.
As reunións presenciais das seccións e dos seminarios da Real Academia Galega suspendéronse durante o confinamento, pero a actividade científica da institución proseguiu. O Seminario de Lexicografía, responsable da revisión e da actualización do Dicionario, incorporou en 2020 case un cento de lemas e realizou modificacións en case trescentas entradas, tanto para engadir acepcións, fraseoloxía, sinónimos ou antónimos como para mellorar a redacción das definicións e dos exemplos. Moitos dos lemas que se incorporaron son palabras que se popularizaron na fala cotiá en plena pandemia. É o caso de asintomático, covid-19, coronavirus, gotícula, desescalada, teletraballo ou triaxe.
A pandemia tamén deixou pegada entre as novas acepcións en lemas xa presentes no Dicionario. A entrada de gromo incorporou así o significado referido á aparición súbita dunha enfermidade epidémica entre a poboación dun determinado lugar; e a de repunta, a que atinxe á nova aparición de algo, especialmente dunha enfermidade epidémica, nun lugar en que xa estaba controlada ou en vías de desaparición.
