O Portal das Palabras mellor Proxecto Colaborativo Empresarial

A Asociación de Empresas Galegas dedicadas a Internet e ás Novas Tecnoloxías (Eganet) decidiu na X Edición dos seus premios anuais que o Portal das Palabras é o mellor proxecto do ano 2013 na categoría de Cooperación Empresarial.

Desde hai dez anos os Premios Eganet son un referente para o sector TIC en galego e constitúen o mellor escaparate para os proxectos realizados por empresas ou entidades galegas no campo das tecnoloxías da información e a comunicación.

O Portal das Palabras conseguiu este ano  ser  o gañador na categoría de Proxecto Colaborativo Empresarial TIC, ao consideralo o xurado unha iniciativa de cooperación pioneira para a difusión e modernización do léxico e o traballo lexicográfico, entre unha institución histórica como a Real Academia Galega e unha fundación patrimonial como é a Fundación Barrié. O traballo conxunto das dúas entidades en colaboración con Imaxin|Software e outras empresas de deseño, produtoras de vídeo e de edición, que actúan como parceiros, foi a clave para conseguir un Portal que quere ser actual, dinámico e multiforme, aberto a todas as persoas interesadas na lingua, e que demostra que na mestizaxe e na fusión está o espazo onde as ideas e os proxectos brillan máis.

Así mesmo, que o Portal das Palabras conseguise, de entre as máis de cen candidaturas presentadas este ano a concurso, ser finalista na categoría de Comunicación Dixital é un importante recoñecemento do seu impacto no campo da comunicación en internet. Un éxito avalado cada día nas visitas que recibe a páxina e nos comentarios dos usuarios e usuarias, e tamén polas valoracións que se fixeron do Portal tanto dentro coma fóra do país.
 

Palabras traballadas

Todos os termos que traballamos, fóra das Palabras do día, ordenados alfabeticamente.

Ver

Palabras do día

Unha palabra cada día dos 365 do ano, ordenadas alfabeticamente ou por data.

Ir