Árbore da familia das mimosáceas orixinaria de Australia, de casca lisa e agrisada, follas moi divididas e flores amarelas, recendentes, en forma de boliñas que se agrupan en acios / Flor desta planta
Etimoloxía
Termo tomado do latín científico mimosam que remite a mimus ‘mimo’.
Exemplos *
“As mimosas que Exeria atendía no mes de Febreiro en Galicia, cando se enchía o seu xardín de flores marelas, eran en Nubia grandes e brillantes e tiñan un aroma doce (...). A súa terra comezaba a facérselle tan distante e pequena como as flores que recordaba.” (María Xosé Queizán: Amantia, 1984)
“E nun abrir e fechar os ollos cúbranse as mimosas de marelo, os xeranios por non ser menos daba gloria ollalos coa flor xusta e pola parede sube a hedra e a viña virxe.” (Xohana Torres: Adiós, María, 1971)
* As citas da Palabra do Día respectan as escollas ortográficas e morfolóxicas da edición referida. Os exemplos fan referencia só a unha das posibles acepcións da palabra documentada.
